HARPA

INTERNATIONAL

MUSIC ACADEMY

JUNE 27 - JULY 14, 2018
Alþjóðlega tónlistarakademían í Hörpu er tónlistarnámskeið fyrir nemendur á öllum aldri og á öll hljómsveitar-hljóðfæri. Í ellefu daga nýtur þú leiðsagnar alþjóðlegra kennara og hittir nemendur frá öllum heimshornum. 
Einkatímar, masterklassar, þátttaka í kammertónlist, einleikstónleikum og hljómsveit hvetja þig til að verða betri tónlistarmaður. 

 

DAGSKRÁ VIÐBURÐA 2018

Alþjóðlega tónlistarakademían í Hörpu heldur árlegt námskeið fyrir nemendur í klassískum hljóðfæraleik dagana 27. júní – 14. Júlí. Yfir sjötíu nemendur frá sjö löndum njóta handleiðslu innlendra og erlendra tónlistarkennara í fremstu röð. Nemendur fá einkatíma, þjálfun í kammertónlist og hljómsveitarleik auk fyrirlestra og masterklassa. Alls tuttugu viðburðir, tónleikar, masterklassar og fyrirlestrar, fara fram í Hörpu, Tónskóla Sigursveins og Norræna húsinu.

4. júlí kl 16:30 í Norðurljósum: Masterklass með Guðnýju Guðmundsdóttur

Guðný Guðmundsdóttir á langan og farsælan starfsferil að baki sem fiðluleikari. Hún var konsertmeistari Sinfóníuhljómsveitar Íslands 1974-2010 og hefur kennt öllum helstu fiðluleikurum landsins. Guðný miðlar af áralangri reynslu sinni í þessum masterklassa þar sem nokkrir nemendur eldri deildar Akademíunnar spila fyrir hana og fá kennslu fyrir framan áheyrendur. Aðgangur er ókeypis.

4. júlí kl 20 í Norðurljósum: Opnunartónleikar - Strengjakvartettar

Nemendur sem notið hafa sérstakrar leiðsagnar Sigurbjörns Bernharðssonar, fiðluleikara úr Pacifica String Quartet og prófessors við Oberlin Conservatory, leika þætti úr strengjakvartettum eftir Mozart, Shostakovich, Schumann, Haydn og Mendelssohn. Miðasala er hafin á harpa.is

6. júlí kl. 16:30 í Tónskóla Sigursveins: Lin Yao Ji´s Life and Teaching Essence

Lin Wei Sigurgeirsson, fiðluleikari og listrænn stjórnandi Akademíunnar, heldur fyrirlestur og masterklass byggðan á ævistarfi og kennsluaðferðum föður síns, Lin Yao Ji, en hann var mikilsvirtur prófessor í fiðluleik við hinn heimskunna tónlistarháskóla Beijing Central Conservatory of Music. Aðgangur er ókeypis.

7. júlí kl 12:30 í Tónskóla Sigursveins: Shirley Givens: Ævintýri í Fiðlulandi

Margrét Kristjánsdóttir fiðluleikari kynnir nýtt kennsluefni, Ævintýri í Fiðlulandi. Höfundur kennsluefnisins er hinn virti fiðluleikari og kennari Shirley Givens, en hún lést fyrr á þessu ári. Ævintýri í Fiðlulandi samanstendur af 24 heftum sem leiða nemandann í gegnum fyrstu skrefin á tónlistarbrautinni. Efnið er skrifað út frá sjónarhóli barnsins en miðar um leið við ýtrustu kröfur í fiðlutækni. Aðgangur er ókeypis.

7. júlí kl 16:30 í Tónskóla Sigursveins: Masterklass með Auði Hafsteinsdóttur

Auður Hafsteinsdóttir er einn af fremstu fiðluleikurum landins. Hún hefur hlotið fjölda viðurkenninga fyrir leiks inn, komið fjölmörgum sinnum fram á erlendum vettvangi og fengið frábæra dóma. Auður miðlar af reynslu sinni í þessum masterklassa þar sem nokkrir nemendur eldri deildar Akademíunnar spila fyrir hana og fá kennslu fyrir framan áheyrendur. Aðgangur er ókeypis.

8. júlí kl 16:30 í Tónskóla Sigursveins: Masterklass með Ara Þór Vilhjálmssyni

Ari Þór Vilhjálmsson er leiðari 2. fiðlu Fíharmóníusveitarinnar í Helsinki og framkvæmdastjóri Akademíunnar, en hann starfaði um árabil með Sinfóníuhljómsveit Íslands. Ari Þór miðlar af þekkingu sinni í þessum masterklassa þar sem nokkrir nemendur eldri deildar Akademíunnar spila fyrir hann og fá kennslu fyrir framan áheyrendur. Aðgangur er ókeypis.

10. júlí kl. 16 í Norræna húsinu: Masterklass með Sigyn Fossnes

Sigyn Fossnes sérhæfir sig í kennslu ungra og hæfileikaríkra fiðlunemenda við hinn virta Barratt-Due tónlistarháskóla í Osló. Í þessum masterklass leiðbeinir Sigyn nemendum Akademíunnar og leggur þeim um leið lífsreglurnar varðandi það að hefja nám við tónlistarháskóla. Námskeiðið kallar hún "Teaching Talent". Aðgangur er ókeypis.

10. júlí kl. 20 í Norræna húsinu: Kennaratónleikar

Kennarar Akademíunnar eru í fremstu röð íslenskra og erlendra hljóðfæraleikara, og eru sumir þeirra prófessorar við virta tónlistarháskóla eða leiðarar í sinfóníuhljómsveitum. Á þessum tónleikum munu kennararnir miðla af list sinni með flutningi fjölbreyttra einleiks- og kammerverka. Aðgangur er ókeypis.

11. júlí kl 10 í Kaldalóni: Masterklass með Judith Ingolfsson

Judith Ingolfsson er einn þekktasti fiðluleikari Íslendinga. Árið 1998 vann hún til gullverðlauna í hinni heimsþekktu Indianapolis fiðlukeppni og hefur síðan þá komið fram í bestu tónleikasölum heims. Judith miðlar af þekkingu sinni í þessum masterklassa þar sem nokkrir nemendur eldri deildar Akademíunnar spila fyrir hana og fá kennslu fyrir framan áheyrendur. Aðgangur er ókeypis.

11. júlí kl 14 og 16 í Kaldalóni: Rising Stars – Tónleikar eldri deildar

Fimmtíu nemendur frá sjö löndum taka þátt í eldri deild Akademíunnar. Á tónleikunum leika nemendur einleiksverk sem þeir hafa notið handleiðslu við hjá úrvalskennurum á námskeiðinu. Miðasala er hafin á harpa.is

12. júlí kl. 10 í Norræna húsinu: Vinnustofa í kammermúsík

Judith Ingolfsson og Vladimir Stoupel hafa getið sér gott orð sem einleikarar. Þau hafa einnig leikið saman sem dúó um árabil og fengið lofsamlega dóma fyrir metnaðarfullan og þéttan samleik. Í þessari vinnustofu leika nokkrir valdir nemendur kammertónlist fyrir þau bæði og njóta kennslu þeirra í samleik fyrir framan áheyrendur. Aðgangur er ókeypis.

12. júlí kl 16 á Norðurbryggju: Rising Stars – Kammertónleikar eldri
deildar

Fimmtíu nemendur frá sjö löndum taka þátt í eldri deild Akademíunnar. Á tónleikunum flytja allir kammerhópar deildarinnar kafla úr þekktum kammerverkum. Aðgangur er ókeypis.

13. júlí kl 11 í Hörpuhorni: Rising Stars – Tónleikar yngri deildar

Tuttugu nemendur taka þátt í yngri deild Akademíunnar. Á tónleikunum leika nemendur einleiksverk sem þeir hafa notið handleiðslu við hjá úrvalskennurum á námskeiðinu. Aðgangur er ókeypis.

13. júlí kl 12:30 í Norðurljósum: ,,Á vængjum söngsins” – Fiðlutónleikar með Ziyu He

Hinn 18 ára Ziyu He hefur fangað athygli fiðluheimsins undanfarin ár með því að vinna til gullverðlauna í alþjóðlegum fiðlukeppnum. Ziyu He leikur ásamt píanóleikaranum Vladimir Stoupel fjölbreytta efniskrá með verkum eftir Schubert, Dvorák, Paganini og Li Zili. Miðasala er hafin á harpa.is

13. júlí kl 14 og 16 í Norðurljósum: Rising Stars – Tónleikar eldri og yngri deildar

Fimmtíu nemendur frá sjö löndum taka þátt í eldri deild Akademíunnar. Á tónleikunum leika nemendur einleiksverk sem þeir hafa notið handleiðslu við hjá úrvalskennurum á námskeiðinu. Á tónleikunum kl 14 koma einnig fram nemendur yngri deildar og flytja nokkur kammerverk sem þeir hafa æft á námskeiðinu. Miðasala er hafin á harpa.is

14. júlí kl 12 í Eldborg: Rising Stars – Píanótónleikar eldri deildar

Fimmtíu nemendur frá sjö löndum taka þátt í eldri deild Akademíunnar. Á tónleikunum stíga píanónemendur námskeiðsins fram og leika einleik á besta flygilinn í Hörpu, verk sem þeir hafa notið handleiðslu við hjá úrvalskennurum á námskeiðinu. Miðasala er hafin á harpa.is

14. júlí kl. 16:00 í Hörpuhorni: ,,Dansað á strengjum” – Strengjasveit yngri deildar

Fiðluleikarinn og júróvisjónstjarnan Greta Salóme Stefánsdóttir leiðbeinir strengjanemendum yngri deildar í tónlistarspuna með dansívafi. Áheyrendur fá að njóta afraksturs samvinnunnar á tónleikunum. Aðgangur er ókeypis.

14. júlí kl 17 í Eldborg: ,,Fullveldi í 100 ár” – Hátíðartónleikar

Alþjóðlegu tónlistarakademíunni í Hörpu lýkur með tónleikum hljómsveitar Akademíunnar. Leikin verða fjögur þekkt tónverk, þar á meðal Hetjusinfónía Beethovens og Eldur eftir Jórunni Viðar. Stjórnandi er Bjarni Frímann Bjarnason, einleikarar Ziyu He og Ásta Dóra Finnsdóttir. Miðasala er hafin á harpa.is

 

Partners / Sponsors

mom merki-a-vef-skjoldur-vinstr ylir

menuhin2    lin-yao